पाँच विम्बमा देश

२०७७ श्रावण १२, सोमबार मा प्रकाशित ४ साल अघि

साउन १२, २०७७

अमित घिमिरे

१)
यो देश बुद्धको हैन
देश बलात्कारीहरुको हो ।

२)
न्याय मरेको मुलुकका
ज्यानमारा उन्मुक्ति पाउँछ
गीत गाउने र लेख्ने जेलमा सड्छ
सम्बृद्धि पोलमा पासो पर्छ
पाङ्ग्रेहरु खुट्टो उचालेर सलामी दिन्छन् ।

३)
भूगोल र झण्डामा मात्र
देश–देश भएको छ
नागरिक भएर देश देश भएको छैन
महिसासुरले दुर्गा वध गर्ने देश हो यो ।
व्यर्थै देश खोजेर बौलाउँछन् यज्ञराज
बौलाउनलाई कर तिर्नुपर्ने राष्ट्रका प्रजाहरु
फेरि पनि सौभाग्यसाली नागरिक
यज्ञराज, दुर्गादेवी
नीलप्रसाद, गंगामाया
म, तपाई, हामी सबै–सबै ।

४)
के को रोइलो हो यो
हुँडारहरुको
कता गन्हायो यहाँ सिनो
के निर्मलाका अमलाका गेडा जत्रा छातीको अझै
मासुका चौटाहरुको अवशेष रहेछ
गोविन्द केसीको मासु लुस्न पाएनन् क्यार !
नन्दप्रसाद अधिकारी त अस्तु भए क्यार !

५)
गिद्धहरुले कसोरी छोडेछन् त चौटो
उधिन्ने मन गरेनछन्
शायद डकार आउने गरी
अमन हुने गरी काँचो मासु लुसेंपछि
गिद्धहरु उधिनी बस्दैनन् शेष मासुहरु ।

(भिडियो)