खबरज्योति,
१७ साउन २०७५, सिन्धुपाल्चोक ।
सिन्धुपाल्चोक जिल्लाको धार्मिक तथा पर्यटकीय क्षेत्र पाँचपोखरीमा केबुलकार सञ्चालन हुने भएको छ ।
केबलकार सञ्चालन गर्ने पहिलो प्रयास अन्तर्गत प्रारम्भिक प्रतिवेदन तयार गरिएको छ । पाँचपोखरी थाङ्पालधाप गाउँपालिकामा पर्ने भोताङको छिम्ती देउरालीबाट लौरीविनायकसम्म केबुलकार सञ्चालनमा ल्याइने भएको हो ।
यसको लम्बाइ साढे ६ किमी हुने प्रतिवेदनमा उल्लेख छ । त्यहाँ जडान गरिने केबलकार देशकै सबैभन्दा बढी उचाइको हुने समेत प्रतिवेदनले जनाएको छ । पाँचपोखरी क्षेत्र समुन्द्री सतहबाट चार हजार १५१ मिटरको उचाइमा पर्दछ । केबुलकार निर्माण गर्न दुई अर्ब लगानी लाग्ने अनुमान छ ।
केबुलकार व्यवस्थापन समितिका संयोजक एवं वडा नं ३ का वडाध्यक्ष ङिमाछिरिङ तामाङका अनुसार पाँचपोखरी क्षेत्रको पर्यटन व्यवस्थापनका लागि चालु आर्थिक वर्षमा ५० लाख रुपेयाँ बजेट छुट्याइएको छ ।
प्रारम्भिक प्रतिवेदन पछि विभिन्न केबुलकार प्रदायक कम्पनीसँग सम्पर्क गरिएको र विशेष गरी कुमारी बैंकले लगानीको लागि रुची देखाएको गाउँपालिकाका प्राविधिक सहायक कुमार बस्नेतले जानकारी दिए ।
खबरज्योति डट कमका लागि
प्रवन्ध निर्देशक : विदुर गिरी
प्रधान सम्पादक : युवराज गिरी
प्रतिक्रिया दिनुहोस