मंसिर १, २०८९
चाैतारा । तातोपानी नाका हुँदै नेपाल हुने आयात पुनः घटेको छ । दशैं लगत्तै नाकाबाट दैनिक १८ कन्टेनरसम्म मालसामान आयात हुन थालेकोमा अहिले १० कन्टेनरमा झरेको भन्सार कार्यालय तातोपानीले जनाएको छ ।
अहिले नाकाबाट रोल कपडा, स्याउ, ओखर, रेडिमेट मालसामान भित्रिरहेको भन्सार प्रमुख नारद गौतमले बताए । ‘केही समय दैनिक १७ कन्टेनरसम्म मालवस्तु आयात हुन थालेको तर अहिले पुनः १०/११ मा झरेको छ,’ गौतमले भने ।
जाडो मौसम शुरु भएसँगै चिनियाँहरुले नाकामा कोभिड प्रोटोकलमा थप कडाइ गरेको गौतमले बताए । चिनियाँ पक्षले कुनै औपचारिक जानकारी नदिएको र आफू खुसी कन्टेनर कति पठाउने भन्ने निर्णय गरिरहेको तातोपानी भन्सार प्रशासनले जनाएको छ ।
केही समय अघि अर्थमन्त्रीसहितको उच्चस्तरीय टोलीले नाकाको स्थलगत निरीक्षण गरेपछि व्यापार सहजीकरणमा थप प्रगतिको आशा व्यावसायीहरुले गरेका थिए ।
उत्तरतर्फको व्यापारको अर्को ठूलो नाका रसुवागढीको व्यापार भने पूर्ववत अवस्थामै रहेको रसुवा भन्सार कार्यालयले जनाएको छ । चीनतर्फबाट दैनिक ९ टेलर सामान आइरहेको रसुवा भन्सार कार्यालयका सूचना अधिकारी नरेन्द्रप्रसाद चौधरीले बताए । नेपालतर्फ सामान आयातका लागि ३५ जना नेपाली श्रमिक चीनतर्फ रहेको उनले जानकारी दिए ।
भन्सार यार्ड फराकिलो बनाएर आयात वृद्धि गराउन कुटनीतिक छलफल भइरहेको चौधरीको भनाइ छ । रसुवागढी भएर अहिले जाडोको लुगा र जुत्ताहरु एवं जलविद्युत कम्पनीका ठूला मेसिनहरु आयात भइरहेको भन्सार कार्यालयले जनाएको छ ।
खबरज्योति डट कमका लागि
प्रवन्ध निर्देशक : विदुर गिरी
प्रधान सम्पादक : युवराज गिरी
प्रतिक्रिया दिनुहोस