खबरज्योति
२४ कार्तिक २०७४, सिन्धुपाल्चोक ।
माओवादी केन्द्र निकट अखिल क्रान्तिकारीले जिल्ला शिक्षा कार्यालय सिन्धुपाल्चोकमा शुक्रबार ज्ञापनपत्र बुझाउँदै माध्यमिक तहसम्मको शिक्षा निःशुल्क पाउने हक कार्यान्वयन गर्न माग गरेको छ ।
अखिल क्रान्तिकारीका जिल्ला अध्यक्ष मिलन लामा नेतृत्वको टोलीले ज्ञापनपत्र बुझाएको हो ।
ज्ञापनपत्र बुझाएपछि अखिल क्रान्तिकारीका जिल्ला अध्यक्ष मिलन लामा नेतृत्वको टोली ।
७ बुँदे ज्ञापनपत्रमा संविधानको ३१(५) नेपालमा बसोवास गर्ने प्रत्येक नेपाली समुदायले कानून वमोजिम आफ्नो मातृभाषामा शिक्षा पाउने हक हुनेछ र त्यसका लागि विद्यालय तथा शैक्षिक संस्था खोल्ने र सञ्चालन गर्ने हक हुनेछ, भन्ने व्यवस्थालाई कार्यान्वयन गर्नुपर्ने, स्थानीय तह तथा प्रदेशका नागरिकलाई मातृभाषामा पठनपाठनको व्यवस्था गर्नुपर्ने लगायतका माग समेटिएका छन् ।
त्यस्तै दस प्रतिशत छात्रवृत्तिको ग्यारेण्टी गरिनुपर्ने, सार्वजनिक शिक्षाको स्तरोन्नतिको लागि सार्वजनिक विद्यालयहरुमा प्रयाप्त बजेटको व्यवस्था गरी अनुगमन र नियमनको प्रक्रियालाई व्यवस्थित गरिनुपर्ने, शिक्षामा भईरहेको नीजिकरण र माफियाकरणलाई नियन्त्रण गर्न संस्थागत विद्यालय संचालन निर्देशिका कार्यान्वयन गर्नुका साथै अनुगमन र नियमनको प्रक्रियालाई व्यवस्थित गरिनुपर्ने, भूकम्पबाट क्षतिग्रस्त भएका शिक्षण संस्थाहरुको पुनर्निर्माण तत्काल गरिनुपर्ने लगाएतको माग ज्ञापनपत्रमा उल्लेख छ ।
अखिल क्रान्तिकारीले आज देशभरका स्थानीय तहमा ज्ञापनपत्र बुझाउँदै शिक्षा, स्वास्थ्य र रोजगारको हक कार्यान्वयन गर्न माग समेत गरेको छ ।
खबरज्योति डट कमका लागि
प्रवन्ध निर्देशक : विदुर गिरी
प्रधान सम्पादक : युवराज गिरी
प्रतिक्रिया दिनुहोस