गालीको भाषा नबोली चुनाव जितेका सुवोध, जसले असम्भव सपना बाँडेनन्

मंसिर ८ , २०७९

चौतारा । सिन्धुपाल्चोक–१ बाट नवनिर्वाचित माधव सापकोटाको निर्वाचन प्रचारका क्रममा अन्य उम्मेदवारका विरुद्धमा गालीको भाषा बोलेनन् र आफ्नो ‘एजेण्डा’ मात्रै प्रस्तुत गरेको राम्रै चर्चा भएको थियो ।

राजनीतिमा युवा आउनुपर्छ भन्ने मान्यता राख्दै आएका उनले असम्भव सपना बाँड्ने र विपक्षीलाई गाली गरेर समय खेर फालेनन् । बरु उनले जनताका कुरा सुने । जित पछि पनि जनताकै बीचमा बसेर काम गर्ने योजनाका खाका बनाउने बाचा गरे ।

अन्तिम मत परिणाम सार्वजनिक भएपछि उनले सिन्धुपाल्चोकको सदरमुकाम चौतारामा सञ्चारकर्मीसँग कुरा गर्दै आफूले जिल्लामा स्थापित गरेको सकारात्मक राजनीतिलाई आगामी दिनमा अझै अगाडि बढाउने बताए ।

विगत दुई दशकदेखि निरन्तर राजनीति र समाजसेवामा खटिरहेका ‘सुबोध’ नामले परिचित सापकोटा सिन्धुपाल्चोकका युवामाझ लोकप्रिय छन् । सहज पहुँच, जनताको घर आँगनमा पुग्ने, जनताका कुरा सुन्ने, सबैको काम गर्ने उनको बानीले उनलाई जिल्लावासीले एक दशक अघिदेखि नै वैकल्पिक नेतृत्वका रूपमा स्वीकार गर्दै आएका छन् ।

नेकपा (माओवादी केन्द्र) का पोलिटब्युरो सदस्य एवं सिन्धुपाल्चोक जिल्ला इन्चार्ज रहेका उन स्पष्ट अडान र योजना भएका नेताका रूपमा परिचित छन् । कुविन्डेमा जन्मिएका ४० वर्षीय सापकोटा बाल्यकालदेखि नै राजनीतिक वातावरणमा हुर्किएका थिए । १३ वर्षको उमेरदेखि विद्यार्थी राजनीतिमा सक्रिय उनी २०५६ पुसमा अखिल क्रान्तिकारीको जिल्ला अध्यक्ष, २०५६ माघदेखि पूर्ण रूपमा भूमिगत थिए ।

विसं २०६० जेठदेखि सिन्धुपाल्चोक जिल्ला सचिवको भूमिका सम्हालेका थिए । माओवादीले सञ्चालन गरेको तत्कालीन जनयुद्धमा कुशल संगठनकर्ता नवनिर्वाचित सापकोटा २०७३ मा माओवादीको केन्द्रीय सदस्य बनेका थिए । विसं २०७९ असारदेखि पोलिटब्युरो सदस्य एवं जिल्ला इञ्चार्जका रूपका कार्यरत उनले राजनीतिशास्त्रमा स्नातकोत्तरको अध्ययन गरिरहेका छन् ।

विसं २०७१ सालको जुरे पहिरो, २०७२ को महाभूकम्प, लिदि पहिरो, नागपुजे, खागदल, २०७८ को मेलम्ची बाढीलगायतका जिल्लाका ठूला साना प्राकृतिक विपत्ति, कोभिड–१९ को समय एवं अन्य अप्ठेरोमा सहजै जनतामाझ पुगेर राहत, उद्धार, उपचारमा सक्रिय बनेका कारण पनि उनलाई आम मतदाताले यसपटक स्वीकार गरेको टिप्पणी छ ।

स्थानीय तह निर्वाचन २०७९ मा जिल्लाको चुनावी कमाण्डर, सभामुख अग्निप्रसाद सापकोटाको २०६४, २०७०, र २०७४ को तीनवटै चुनावमा कमाण्डर एवं आन्तरिक व्यवस्थापन सम्हालेर सुबोधले सफलता हासिल गरेका थिए । उनलाई विगत १५ वर्षयता जिल्लाको चुनावी प्रतिस्पर्धा बारे गहिरो ज्ञान थियो । सोही ज्ञानलाई यसपटक आफ्नै लागि प्रयोग गरेको भन्नेहरू पनि प्रशस्तै छन् ।

काठमाडौँ नजिकै रहेको जुगल हिमाल आरोहण खुलाउने एक प्रमुख पहलकर्ताको भूमिका खेलेका सापकोटा सिन्धुपाल्चोकको समग्र विकास र समृद्धिका लागि नीतिगत निर्णय गर्ने ठाउँमा आइपुगेका छन् । पछिल्लो पटक सिन्धुपाल्चोकमा वाम लोकतान्त्रिक गठबन्धनका सबै उम्मेदवारलाई विजयी गराउने दायित्व आफ्नो समेत रहेको बताउने सापकोटाले सभामुख अग्नि सापकोटाको राजनीतिक विरासतलाई अगाडि बढाउने मौका पाएका छन् ।

सिन्धुपाल्चोकको क्षेत्र नं १ का उम्मेदवार समेत रहेका पूर्वमन्त्री मोहनबहादुर बस्नेतलाई पनि उत्तिकै आदर र सत्कार प्रदान गर्दै वाम लोकतान्त्रिक गठबन्धनलाई विजयी गराउने सपना पूरा भएको छ सापकोटाको । सिन्धुपाल्चोकको प्रतिनिधिसभातर्फ क्षेत्र नं १ को परिणाम सार्वजनिक हुने क्रममा छ । त्यस क्षेत्रमा पनि गठबन्धनका तर्फबाट काँग्रेस नेता बस्नेत उम्मेदवार छन् ।

उम्मेदवार मनोनयनका क्रममा आफ्ना सहकर्मीहरू युवराज दुलाल, सरल सहयात्री पौडेलसँग एउटै रङ्गका पोशाकमा देखिदा देशव्यापी रूपमा चर्चा कमाउन सफल सापकोटाले ३० हजार तीन सय ७४ मत प्राप्त गरी विजयी भएका हुन् । उनका निकटतम् प्रतिस्पर्धी नेकपा एमालेका उम्मेदवार सरेश नेपालले २७ हजार १८ मत प्राप्त गरेका थिए ।