मंसिर ११, २०७८
एजेन्सी । कोरोना भाइरसको नयाँ भेरियन्ट पत्ता लागेसँगै विभिन्न देशहरूले यात्रामा कडाइ गरेका छन् । दक्षिण अफ्रिकामा बिहीबार तीव्र रूपमा फैलिरहेको नयाँ भेरियन्ट पत्ता लागेको थियो ।
नयाँ पत्ता लागेको बी.१.१.५२९ भेरियन्ट अहिलेसम्मकै खतरनाक भएको बताइएको छ । यो यसअघि फैलिएका अन्य भेरियन्टहरूभन्दा धेरै भिन्न र उत्परिवर्तनको अस्वाभाविक समूह देखिएको दक्षिण अफ्रिकास्थित सेन्टर फ इपिडेमिक रेस्पोन्स एन्ड इनोभेसनका निर्देशक प्राध्यापक टुलिओ डी ओलिभयराले बताए ।
नयाँ भेरियन्टविरुद्ध अहिले भइरहेका खोपहरू कम प्रभावकारी हुने चिन्ताकाबीच यसलाई फैलन नदिन विभिन्न देशहरूले कडाइ गरेका हुन् ।
बेलायतले दक्षिण अफ्रिका सहित ६ अफ्रिकी मुलुकहरूको उडान निलम्बन गरेको छ र ती मुलुकहरूबाट फर्किने यात्रुलाई क्वारेन्टिनमा बस्न भनेको छ ।
यसैबीच, युरोपेली आयोगकी अध्यक्षे उर्सुला भोन डेर लियनले इयुले पनि त्यस क्षेत्रबाट हुने हवाइ यात्रा रोक्ने लक्ष्य राखेको बताएकी छन् ।
भारतले पनि दक्षिण अफ्रिका र अन्य जोखिममा रहेका मुलुकहरूबाट आएका यात्रुहरूलाई कडाइपूर्वक परीक्षण गर्न सबै राज्यहरूलाई ‘एडभाइजरी’ जारी गरेको छ ।
सिंगापुरको स्वास्थ्य मन्त्रालयले त्यस क्षेत्रबाट हुने आगमनमा प्रतिबन्ध लगाउन सक्ने बताएको छ । जापानले पनि दक्षिण अफ्रिका र अन्य पाँच अफ्रिकी मुलुकहरूको यात्रुहरूलाई कडाइ गरेको छ ।
वैज्ञानिकहरूले नयाँ भेरियन्टको बारेमा अध्ययन गरिरहेका छन् । तर, यस खबरले विश्वव्यापी स्टक र तेल बजारलाई धक्का दिएको छ ।
नयाँ भेरियन्टको बारेमा विश्व स्वास्थ्य संगठन (डब्ल्यूएचओ)ले छलफल गर्दैछ ।
खबरज्योति डट कमका लागि
प्रवन्ध निर्देशक : विदुर गिरी
प्रधान सम्पादक : युवराज गिरी
प्रतिक्रिया दिनुहोस