मंसिर ७, २०७८
चौतारा । नेपाली सेनाले सिन्धुपाल्चोकको हेलम्बु गाउँपालिका–७ मा बेलिब्रिज निर्माण प्रक्रियालाई तीव्र बनाएको छ। आगामी पुस मसान्तसम्म निर्माण सम्पन्न गरी सञ्चालनमा ल्याउने लक्ष्यका साथ काम भइरहेको सैनिक जनसम्पर्क तथा सूचना निर्देशनालयले जनाएको छ ।
हेलम्बुस्थित चनौटे–भिरखर्क जोड्ने ‘ट्रस ब्रिज’ (रातो पुल) गत असारमा मेलम्ची खोलामा आएको बाढीले बगाएको थियो । पुल अभावका कारण स्थानीयबासीको दैनिक जीवन प्रभावित भएका कारण नेपाली सेनाले गत कार्तिक ४ गतेबाट बेलिब्रिज निर्माण कार्य थालेको हो ।
निर्देशनालयका अनुसार उक्त पुल निर्माणका लागि हाल सर्भे कार्य सम्पन्न भइ डिजाइन र लागत तयार भइसकेको छ । पुल निर्माण गर्ने स्थानमा गाउँपालिकाको सहकार्यमा ह्युम पाइप राखेर अस्थायी ट्रयाक निर्माण गरी हाललाई आवागमन सहज गरिएको पनि निर्देशनालयले जनाएको छ ।
निर्देशनालयका अनुसार पुल निर्माणका क्रममा स्थानीय करिब २५ जनालाई रोजगारीसमेत उपलब्ध गराइएको छ । जडान गरिने बेलिब्रिजका अधिकांश सामग्री दमौलीबाट ढुवानी गरी स्थान विशेषमा एकीकृत गरिसकिएको र केही सामग्री ल्याउने क्रममा छ।
खबरज्योति डट कमका लागि
प्रवन्ध निर्देशक : विदुर गिरी
प्रधान सम्पादक : युवराज गिरी
प्रतिक्रिया दिनुहोस