असार ३, २०७८
चौतारा : मेलम्ची नदीमा आएको बाढीका कारण मृत्यु हुनेको संख्या तीन पुगेको छ। मंगलबार साँझबाट आएको बाढीकै कारण अन्य १७ जना सम्पर्कविहीन भएका छन्।
मृत्यु हुनेमा दुई जना चिनियाँ र एक जना भारतीय नागरिक छन्। चिनियाँ नागरिक गोङ टियान छिगोको शव इन्द्रावती ११ मा फेला परेको हो भने अर्का चिनियाँ नागरिक यु चि झुको सिन्धुली जिल्ला, सुनकोशी ५ मा शव फेला परेको हो।
त्यस्तै, भारतीय नागरिक कमललोचन महतोको सिन्धुली जिल्लाकै सुनकोशी(७ को सुनकोशी नदी किनारमा शव फेला परेको जिल्ला प्रशासन कार्यालय सिन्धुपाल्चोकका सहायक प्रमुख जिल्ला अधिकारी बाबुराम खनालले बताए।
त्यस्तै, पछिल्लो अपडेटअनुसार १७ जना व्यक्ति बाढीको कारण सम्पर्कविहिन भएका छन्। हेलम्बु गाउँपालिकाबाट बाढीमा परी बेपत्ता भएका २१ जनामध्ये ४ जना सम्पर्कमा आएपछि बेपत्ताको संख्या १७ कायम भएको हो।
बुधबार सम्पर्कमा नआएकामध्ये सिन्धुपाल्चोक जिल्ला, त्रिपुरासुन्दरी गाउँपालिका १, घोरथलीका देब खत्री, राम थापा, सुवास जिरेल र कमल खत्री काभ्रेपलाञ्चोकको धुलिखेलबाट सम्पर्कमा आएका हुन्।
खबरज्योति डट कमका लागि
प्रवन्ध निर्देशक : विदुर गिरी
प्रधान सम्पादक : युवराज गिरी
प्रतिक्रिया दिनुहोस