फागुन २५, २०७७
काठमाडौं : प्रचण्ड–नेपाल स्थायी समितिको बैठकले पूर्वएमाले र पूर्वमाओवादी अलग अलग भएर जाने निर्णय गरेको छ।
पेरिसडाँडामा बसेको यो समूहको बैठकले यस्तो निर्णय गरेको हो। बैठकबारे जानकारी गराउँदै वरिष्ठ नेता झलनाथ खनालले आआफ्नो पार्टीबाट रहेर एकताका लागि पहल गर्ने निष्कर्ष बैठकले निकालेको बैठकपछि बताए।
अब एमाले र माओवादी केन्द्र आफ्नोआफ्नो हिसाबले अघि बढ्ने भएका छन्। खनालले भने, ‘अदालतको फैसला राजनीतिक भयो, यसमा हाम्रो असहमति छ। तर फैसला मान्नैपर्यो,’ बैठकबाट फर्किंदै खनालले भने, ‘फेरि भेटौंला।’
एकता पहल जारी राख्ने
प्रचण्ड–माधव समूहका प्रवक्ता नारायणकाजी श्रेष्ठले सर्वोच्चले नेकपाबारे गरेको निर्णयप्रति गम्भीरतासाथ लिएको बताएका छन्। पेरिसडाँडामा बसेको यो समूहको स्थायी समितको बैठकमा सर्वोच्च अदालतले गरेको निर्णयबारे निकै गहिरो ढंगले छलफल भएको उनले बताए।
नेकपा नामका लागि आफूहरूले दिएको रिट निवेदनभन्दा बाहिर गएर सर्वोच्चले फैसला गरेको र यसलाई राजनीतिक विषय बनाएको प्रति उनले असन्तुष्टि व्यक्त गरे। ‘रिट निवेदकभन्दा, मागदाबीभन्दा बाहिर गएर पार्टी विभाजन गर्ने फैसला सर्वोच्चले सुनायो। यसप्रति हाम्रो गम्भीर ध्यानकर्षण भएको छ। हाम्रो गम्भीर असहमति छ’ उनले भने।
यसबारे कानुनी ढंगले उपचार खोज्ने पनि बैठकमा निर्णय भएको उनले बताए। २०७५ जेठ ३ गते भएको एकताको उद्देश्यलाई गम्भीरसाथ लिएर अगाडि बढ्ने छलफल भएको पनि उनको भनाइ थियो। पार्टी एकता सही भएको समीक्षा गरिएको र नेपालका कम्युनिष्ट एकतालाई जारी राखिएको उनले बताए।
साथै सर्वोच्चको फैसलाप्रति असहमति र न्यायिक पुनरावलोकनमा जाने पनि उनले बताए। पार्टी एकता सही हो वा गलत भन्ने पत्रकारको प्रश्नमा उनले स्पष्ट उत्तर दिएनन्। तर तत्काललाई साबिकै नेकपा माओवादी र एमाले भएर जाने र निर्वाचन आयोगमा गएर टुंगो लाग्ने बताए।
एकता पहल जारी राख्ने पनि उनको भनाइ थियो।
खबरज्योति डट कमका लागि
प्रवन्ध निर्देशक : विदुर गिरी
प्रधान सम्पादक : युवराज गिरी
प्रतिक्रिया दिनुहोस